ريدبول بالرسمي تعطيك جوانح ؟

قصة أعلى قفزة في التاريخ .. الحملة الإعلانية الي حولت الشعار إلى حقيقة ملموسة

من سنوات و الشعار التسويقي الشهير لشركة ريدبول المختصة في المشروبات الطاقية كان يجلب الإهتمام لكن يبقى ديما مجرد شعار يعكس وحدة من أهم هواجس الإنسان عبر التاريخ و هي محاولة الطيران

لكن في 14 أكتوبر 2012 شركة ريدبول قلبت الموازين و اختارت انها تحول شعارها التاريخي إلى حقيقة علمية تاريخية ملموسة وين تابع العالم رقم قياسي جديد لأعلى قفزة من الفضاء
المغامر النمساوي فيليكس بومغارتنر بالشراكة مع ريدبول نڨز من على بعد 39 كيلومتر و وصل للأرض في 4 دقايق و 20 ثانية و اخترق زادا سرعة الصوت بش يكون أول جسم بشري يخترق الحاجز هذا ماغير طيارة ولا صاروخ ولا أي دفع من أي نوع

الإعداد للحدث هذا دام خمسة سنين مع كبسولة متطورة و منطاد معبي بغاز الهيليوم بش يطلع بيهم البطل النمساوي للإرتفاع المطلوب و استعمل بدلة فضائية خاصة و متطورة من تصميم شركة ريدبول بش تسهل عملية السقوط من فوق طبقة الستراتوسفير و تحديدا من الإرتفاع الأعلى في التاريخ 39 كيلومتر فوق الأرض

الحدث الكبير هذا لقى اهتمام كبير في العالم الكل و تبعوه أكثر من 8 ملاين على المباشر في اليوتوب و الي هو رقم قياسي وقتها بخلاف أكبر المنصات الإعلامية العالمية .. شبكة سي ان ان وصفت الحدث بأنو قفزة القرن و اعتبرتو أكبر حدث مباشر على الإنترنت وقتها و شبكة بي بي سي وصفتو بأنو مزيج من الاستكشاف العلمي والتسويق الذكي ..

النجاح التسويقي هذا مكن شركة ريدبول إنها تزيد مبيعاتها ب7% أي حوالي 1،6 مليار علبة من المشروب الطاقي لكن الأهم هو أنو حول المنتج من مجرد مشروب طاقي إلى رمز للجرأة وكسر الحدود

قفزة ريدبول ستراتوس ما كانتش مجرد مغامرة إنسانية، بل قفزة تسويقية ملهمة أثبتت أن الشعارات تنجم تتحول إلى واقع ملموس، وأن الجرأة والابتكار ينجمو يصنعو حدث يتذكرو العالم كله.